Sujet vom Faasnachts-Comite

»Mr basse in kai Schublaade«   Fasnacht vom 23.-25. Februar 2015

Ändlig haissts jetz rädäbäng.
Die Schublaade sinn vyl z äng.
Uuse sait die Alti Dante.
Spiilet joo nit die Scharmante.
Ueli, Waggis, gännd ain druff,
machet eiri Schnure uff!

Schrybet Zeedel fräch und spitz,
Schnitzelbängg mit Gaischt und Witz.
Lisischs, kasch nyt anders mache,
als au uff em WC z lache.

Was dur s Joor so schief als goot,
saisch au am Regierigsroot.
S het dr Wessels drum verzellt,
är haig Oorestöpsel bstellt.

Glygge, Gugge, Bänggler, Wääge,
alli dien die Fasnacht prääge,
dorum zaigt is die Blaggedde,
d Fasnacht het so vyl Facette.
Mainsch si basst no in d Schublaade,
noo bisch gaischtig arg verlaade.

Das Schublaademöbel doo
duet am Rhy als Rochedurm stoo.
S dunggt is, ooni doo z benoote,
s isch d Blaggedde besser groote.

Kinschtler isch dr Tarek Moussalli,
wo sich sait, i hoff, dass si eich gfalli.
Die Schublaade gseesch perfäggt,
denn dr Müller het si präggt.
Bim Verkauf, i sags eich hit,
giltet aber s Motto nit.
Jetz muesch in d Schublaade basse:
Gang gschwind go d Blaggedde fasse!