Vo woo kunnt dr Namme Sumpfdotter ?

d Sumpfdotterblueme gheert zue de Haanefuessgwächs. D Bliiete hän e satts lyychtens gääl. d Bletter sin dunggelgrien, nierefermig und hän e gheerbte Rand. D Sumpfdotterblueme gedeiit nuur an grundwasser-fiiechte Standort, wiie Sumpfwiise, Dych- und Flussboord. Diie Sumpfdotterblueme isch giftig und wird vo Insäggte bestäubt, dr Soome verbraitet sich im Wasser, dooner schwimmfääig isch.
 

und jetz zer Gschicht:

Finf Spediteere und Zoll-Degglaarante hänn anno 1951 bschlosse, d Faasnacht kinftig gmainsam zerlääbe. Zue dääm haarte Kärn hän sich noo ainigi wiitere Kollege drzue gsellt. Glyy emool isch s aagschträbti Zyl vo mee as e Dotzed voll gsi. As Namme vo dääre Grubbe isch d’ Sumpfdotterblueme Getti gstande. Diie offizielli Grindig vo dääre neie Gligge het denn e Jeerli speeter stattgfunde, also im 1952. Sythäär het d Gligge Joor fir Joor am Cortège aggdiv dailgnoo. E „aigene“ Waage isch 1953 uss em Fuerpargg vo dr domoolige Warteck-Brauerei fir 50 Frangge (!) ibernoo woorde. So isch d Sumpfdotter-Gligge mit iire 10-12 Waggis , zooge vo me urwichsige „Zwaischpänner“, zue me feschte Dail vom Cortège woorde... aafänglig mit dradizioonelle Mimoose, Orangsche – (jamais avec Räppli) – Spreyer und Saublootere bi me „pro Maa-Keschte-Aadail“ vo alles in allem saagehafte 62 Stutz (anno 1955). Daas sin noo Zyte gsi!

Zylsetzig vo dr Gligge isch Pflääg der Ghollegialited, Gselligkait und Ghuldur. Dääne Maxime wird jetzt derwyyl iber finf Joorzäänt nooch glääbt. Statt Iebe vo Drummle ooder Pfyffer-Määrsch ... oder soo, dräffe sich d Mitgliider, gmäss Jooresbrogramm, aimool im Mooned zue me spezielle, obligadoorische Aaloss. Doo drnääbe gits jeede Donnschtig e fagguldadive Hogg in unsrem Stammlokal, an däm sich immer e baar Mitgliider dräffe.

Syt 1965 bsitzt d Gligge e koschber Yyrichtig, esoo gnannts Raiseghässeli oder besser e „Saukasse“ (abglaitet vom Spaarsau). Gfiettered wird diie Sau vo iire Mitgliider – sinnigerwyys Saubuebe – u.a. mit soognanntem Buessegäld fir s Versuume vo de obligadoorische Dräffe. Doomit dr Inhalt vo dääre Sau ir nit allzue seer z schaffe macht, wird si all baar Joor zer Schlachtbangg gfiiert ! Doodruff hän sich meerdäägigi Raise ergää. Aafänglig sin unseri Zyl noo in dr Schwiiz gsi, so u.a. 1974 zwai Daag no Montreux und 1981 drei Daag no Ascona. Doo drnääbe sin in de Zwischejoore Wuchenänduusflig organisierd und duuregfiier woorde. Unseri Zyl hän Luzärn, Zyri, Biindnerland, Bärneroberland und au Rüdeshaim am Ryy ghaisse. Speeter hän miir is fir drei bis vier Daag ins Uusland bigää, so 1986 nooch Miinche, 1990 nooch Budabescht, 1993 nooch Hamburg, 1996 nooch Wien, 1999 nooch Keln, 2002 aalässlig zem 50. Jubiläum nooch Amsterdam und 2007 isch in Stadt an dr Moldau, nooch Prag gange. Im 2012 geen mer z Eere vo sächzig Joor Sumpfdotter ins Zäntrum vo de Schwoobe, noo Bärlyyn. Zue de wiitere, reegelmässige Gliggeaggdividääde zelle ooder hän zellt u.a. Dailnaam am Gligge-Grimbbeli, s Duurefiiere vo Lottomätsch, s Mitwirgge an Wooldäädighaitsveraastaltige und dr alljeerligi Gligge-Bummel, dää mer dradizioonsgmäss – loogischerwiis ooni Instrumänd derfyr mit Baslerhuet – im Juni abhaalte.

Mit Bligg uff d Endwigglig iiber finf Joorzäänt zaigt diie persoonelli Zämmesetzig e intressants Bild. D Junioore vo de Mitgliider hän dr driissigst Waaglefescht no voor sich. Derfiir hän d Senioore scho d AHV-Ränte. Vom Handwärgger bis zem SIO (CEO) isch so zimlig alles verdrätte. As Aigenaart vo dr Sumpfdotter-Gligge gilt diie bwäärti Braxis, d Bassiv-Mitgliider wäärde nit „gwoorbe“, sondere alli uus de aigene Raaie ussghoobe. Eebeso wäärde d Neiling – as „d Probables“ bezaichned – vo de Mitgliider voorgschlaage und in d Gliggegmainschaft yygfiiert.

Zem 30-Joor-Jubiläum, im Joor 1982, hän sich ainigi eemooligi „Aggdivi“ derby au Griindigsmitgliider zem Wiiederyystiieg in d Waggishoose entschlosse. Doorum isch Dailnämmerzaal vo de Aggdivfaasnächtler uff siiebzää Waggis aagwaggse, e zwaite Waage, s Asyl het organisierd wäärde miesse. Daas „Doppelgspann“ isch vo däm Zytphunggt aa fir d Sumpfdotter-Gligge zer Dradizioon woorde, diie bis hyt noo Bstand het ... ainzigsti Uusnaam bildet sJoor mit dr Faasnacht 1994 an däm, wäägem Neibau vo dr Wettstaibrugg, vom Comité Verkeersrestriggzioone neetig woorde sin und mir „nuur“ mit aim Waage und 12 Waggis am Cortège dailgnoo hän.

Aalässlig vom eerschte Drummeli im groosse Feschtsaal vo dr MUBA 1993 hämmer, as Waage-Gligge aimoolig, zämme mit dr Stammclique, de Rhyschnoogge 1930, d Schlussnummere mit em Maarsch „dr Waggis“ umraame deerfe. Diie „aasträngendi“ Wuche isch fir alli doomoolige Dailnämmer vo unserer Gligge e unvergässligs Erlääbnis gsi. Noo hit wäärde verschiiedeni Gschichte doo driiber verzellt ...

Noo joorelanger Abstinänz, iiber zwai Joorzäät, isch Sumpfdotter-Clique syt 1997 au Mitgliid vo dr IG-Waage (grindet anno 1974).

Im Joor 2002 het d Sumpfdotter-Gligge iir 50 Joor-Jubiläum fyyre kenne. Diie Faasnacht isch mit 18 Aggdive bestritte woorde. An dr Faasnacht 2003 isch d Sumpfdotter-Gligge s eerschte Mool mitere Stammgligge – de Rhyschnoogge 1930 – e Gliggepartnerschaft yygange. As zuesätzligi Gescht sin d Cheerleaders vom FC St. Galle mit vo dr Partie gsi. E groossaartige Zug, in däm miir e integrierte Dail as Sumpfdotter-Gligge hän kenne si! Ainewääg het sich e Meerhait vo de Sumpfdotter-Mitgliider entschiiede, an dr druffaabe folgende Faasnacht 2004 dr Cortège wiider elai z bestritte.