Sujet vom Faasnachts-Comite

»Heb di fescht«   Fasnacht vom 11.-13. März 2020

D Fasnacht bruucht e kai Kontrolle
Heb di fescht, si kunnt jetz z rolle.
Fünf Fasnächtler uff däm Trotti
wisse, dass me daas nit sotti.
Aagää mien die fünf do nit,
denn es faart eleggtrisch hit.
Und esoo gseesch du die Naare
in d Fuessgängerzoone faare
Grad d Frau Fasnacht duets gärn gsee
Si darf halt e bitzli mee
und si sait, jetz hauet druff
machet d Waggisschnuure uff.
Nämet alli draa mit Witz
aber au e bitzli spitz.

Am Majoor gfallt daas enorm.
Stolz gseesch dää mit Uniform.
Soone Waggis ruesst ganz scheen
und dr Harlekin pfyfft Deen.
S duet e Kind dur d Larve gnaisse
und e Hampfle Räppli schmaisse.
Zvoorderscht styrt dr Gloon e bitz
und si keie nit uf d Schnitz.
Mit vyl Muet geen sii ans Wäärg,
heb di fesch, am Spaalebäärg.
Soo vyl Schwung kaasch nur derte hoole.
Noochemache nit empfoole.

D Fasnacht gseesch du soo komplett
uff däm glaine Trottinett.
Wäär isch soone Faarzyghalter?
Daas isch wider dää Kurt Walter.
Sy Entworf goot gly zum Müller
und d Blaggedde wie e Knüller.
Heb dy fesch und he si fescht
denn am Revers isch si s Bescht.