Sujet vom Faasnachts-Comite

»Zämme im Taggt«   Fasnacht vom 27. Februar - 1. März 2023

Äntlig, äntlig, äntlig, äntlig
Gits – und dasch nid sälbverständlig
Wiider Fasnacht mit Emozioone
Jä und ganz ohni Reschtriggzioone
Vor allem wiider – dasch e Sääge
Mit de Chaise mit de Wääge
Alli zämme das duet zelle
Mit Piccolo und mit Tschinelle
Mit Mimösli und schliesslig dängg
Zoben au mit Schnitzelbängg
S driffts s Motto dorum au exaggt
Fir unsri Zyt «Zämme im Taggt»

S goht äntlig nimme um Symptom
Dr Taggt a git e Metronom
Symbolisch hebt en e Major
Uf dr Blaggedde vo däm Joor
Schliesslig machts denn no dr Aschyyn
Dass Ueli Waggis Harlekin
Do fascht nimme kenne warte
Bis si am vieri deerfe starte
Fir sone Wurf bruuchts en Idee
Jä gha het se dr Désiré
Felix Meyer doch firs Moole
Isch är dr Hampé denn go hoole
Wo si Handwärgg wohl verstoht
Und dorum ganz gnau weiss wies goht
Präggt het si und dasch dr Knüller
Wie allewyl unsre Mike Müller